Senga bag‘ir ochmasman hargiz, Yo ko‘z yoshim ravo ko‘rmasman. Ravo ko‘rmam hatto yomon so‘z, Dardlarimni senga bermasman. Kunduzimni ularman tongga, Toqatimdan toshlar yorilsin. Quvonchlarim aylansin mungga, Shirinimga zahar qorilsin — Men yasharman mag‘rur, muqarrar, Vujudimning tirikdir ori. Birovlarning qasiri emas, O‘z qalbimning o‘zim sardori. Bog‘dan-boqqa ko‘chguvchi bulbul Nolasiga tashna emasman. Mayli dilda so‘nib qolsin gul — Menikidir, senga bermasman. Senga bag‘ir ochmasman hargiz, Yo ko‘z yoshim ravo ko‘rmasman.