Izlab-izlab istaganim topdimmi men, Mehr so‘rab yo sarobga chopdimmi men. Yolg‘izman deb goh eshigim yopdimmi men — Xonamda bir shu’la yoniq, o‘chmadi hech. Gohi shodon, gohi o‘ksik bo‘ldi bag‘ir, Goh kunduzda zulmatlarga to‘ldi bag‘ir. Ziyo izlab za’faronlar bo‘ldi bag‘ir — Xonamda bir shu’la yoniq, o‘chmadi hech. Osmonlarda oy to‘ldimi izlaganim, Oy chiqsa ham, chiqmasa ham bo‘zlaganim. Dunyo kezib men zorini sezmaganim — Xonamda bir shu’la yoniq, o‘chmadi hech. Xonamda bir shu’la yoniq — bag‘ir butun, Oy chiqsa ham, chiqmasa ham yorishar tun. Ikkimizga kunduzlarda yo‘q ekan kun — Xonamda bir shu’la yoniq, o‘chmadi hech.