Qiz deganning ko‘ksi to‘la o‘y bo‘ladi, Yigit bir kun yetilib bo‘y bo‘ladi. Bir tandir non o‘rtada, bir kosa suv, O‘nta o‘zbek yig‘ilsa-to‘y bo‘ladi... Ro‘yoblarga chiqadi shirin tushlar, Kelinchakning yengidan kuyov ushlar... Beshiklarni bo‘shatib bir-biriga, Tug‘iladi To‘maris, Alpomishlar. Suyungandan onalar ko‘zida yosh, Otalar yuzida porlar quyosh. Nabiralar to‘ladi hovlilarga, Bari bir xil-qorasoch-u qoraqosh. Bola gapin yoqtirmas qaytganini, Bizda bola qildirar aytganini. Mayli, sodiq o‘ssa bas, yurtiga u Boshlariga ko‘tarib Vatanini... Dabdabasiz davrada nur bo‘ladi, Kuyov-to‘ra, kelinchak-hur bo‘ladi. Qayda yalla yangrasa kelavering, O‘zbegimning to‘ylari zo‘r bo‘ladi.