Yulduzlarni yutib yubordi bu tun, Yutdi-yu unutib yubordi bu tun. Shunday tunda agar yigʻlaging kelsa, Sen odam ekansan, odam ekansan. Chaqaloq tugʻildi - sochi qop-qora, Koʻzini ochmasdan jilmaydi, qara. Shunday kunda agar kuylaging kelsa, Sen odam ekansan, odam ekansan. Men taskin izladim kuygan jonimga, Suydim, balolarga qoldim, yonimga Kelib sekin holim soʻraging kelsa, Sen odam ekansan, odam ekansan. Tanho bilmasa ham, bilsa ham Vatan, Yigʻlasa ham Vatan, kulsa ham Vatan, Unga jonni tikmoq tilaging boʻlsa, Sen odam ekansan, odam ekansan. Qahr bu - adovat, araz oʻtkinchi, Quyosh koʻtarilib, quyosh botguncha, Kerakmaslarga ham keraging boʻlsa, Sen odam ekansan, odam ekansan.