Ey gul, Seni unutdim, Uzib ketdi boshqalar. Mana, endi ilk sevgim Yuragimga tosh qalar... O, bu toshlar bir og‘ir, Har qirrasi qizil cho‘g‘, Og‘riydi, jonim og‘rir, Bu og‘riqqa davo yo‘q... G‘uncha eding, Gul eding, Ochilmasdan so‘lding-ku, Baxtim eding bor umrim Yetmas azob bo‘lding-ku! Unutmoq ham shunchami, Dunyo to‘ldi bo‘g‘zimga. Yonib turgan kunchalik Botib qolding ko‘zimga... Ey gul, sendan kechdimu Unutolmay bag‘rim qon. Xayolingdan o‘chdimu Xayolimda sen hamon Uzib ketdi boshqalar, Yulib ketdi boshqalar. Mana endi bir armon Yuragimga tosh qalar. O, bu armon ko‘p og‘ir, Har qirrasi qizil cho‘g‘. Og‘riydi, jonim og‘rir, Bu og‘riqqa davo yo‘q... Bir kun ko‘rib tanidim, Tosh yo‘ldagi izingni. Peshvoz chiqqan men edim, Ketding burib yuzingni. Salom sevgim — azobim! Boq, bevafo yoringga. Shukur qildim ortingdan Bu dunyoda boringga. Ketding xayol singari, Qadamingdan chaqnab cho‘g‘. Baxtli ayol singari Bebaxt bilan ishing yo‘q. Yana to‘sdi yo‘limni, Yana to‘sdi ilk sevgim. Muzlab qolgan qo‘limni Yuragimga bosdi jim. Bo‘ldi yurak, yig‘lama, Yig‘lagandan ne foyda? Hijron yo‘li muzlama, Toymoq oson bu joyda. Toyding — ketding, Ketganni Sog‘inmoq yo‘q sevgida. Biz boy berdik imkonni, Qoqinmoq yo‘q sevgida. Qara, qizil gulxanday Oftob boqar ufqda. Yana bir kun qiynalmay Aylanmoqda qo‘shiqqa. O‘tmishga aylanmoqda, Aylanmoqda o‘tmishga... Dil qushga aylanmoqda — Dil yana soqov qushga!