Хаста ҳолинг, хаста ўйга ботурсан, Бемажол, бемадор, беҳол ётурсан. Додинг билан дунёни уйғотурсан, Кетиб қолма, Оролим! Оқу қаросисан қаро кўзимнинг, Юзларингга босиб яшай юзимни. Сувинг қуриб, қуритмагил изимни, Кетиб қолма, Оролим! Дарёларинг келолмасдан йиғлар зор, Сенга мадор бўлолмасдан йиғлар зор. Балиқларинг кўзларида савол бор, Кетиб қолма, Оролим! Қирғоғингда қовжираган далангман, Тўлқинларинг титроғиман, нолангман. Мен ҳам битта қақшаб қолар болангман, Кетиб қолма, Оролим!