Юзаки қаралса, марказ ҳашамлари, Осмонўпар уйлар — ҳаммаси гўзал. Аммо бош суқилса, буларнинг бари, Бир оддий маҳалла олдида ўсал. Ўзбегим қомуси — маҳаллам менинг, Сенинг ўз қонунинг, одатларинг бор. Саҳифаси олтин мажаллам менинг, Сен ноқис оёғи етмаган диёр. Барака дейсизми, оқибатми ё, Илиқликнинг бари бунда муҳайё. Шу жойдан бошланар инсоф водийси, Маҳалла — диёнат, маҳалла — ҳаё. Эски томингга ҳам қиламан ҳавас, Қадимий деворлар менга эҳромлар. Чунки осмонўпар қасрларданмас, Маҳалладан чиққан Ғафур Ғуломлар. Шоир эмас, жарчи бўлсайдим агар, Ким келса дердим мен, қайси сарҳаддан: Меҳмон, марказни қўй, маҳаллага бор, Бизда маҳалладан бошланар Ватан!